Xunto a Rosa Aneiros revisa a vida de María Pérez, a galega casada con o compositor Carlos César Lenzi
08 abr 2022 . Actualizado a las 05:00 h.Mareira é un proxecto que nace mirando pola fiestra en medio do confinamento do ano 2020. «Xuntábase o encerro cunha parte de cor e de calor, de quitar emocións nun sentido bonito», lembra Beatriz Pérez (Culleredo, 1970). Artisticamente, chámase Bea a de Estrella, «contestando o de: ti de quen es?», di. Nese estado compuxo a canción que titula o disco-libro. Tirou de todo o demais. «Xurdiron moitas historias e unha delas é a de María Pérez, a miña tía», sinala.
María foi unha emigrante galega que terminou en Arxentina no ano 1927. Alí casou cun compositor de tangos célebre, Carlos César Lenzi. El é o letrista de A media luz, unha das pezas máis célebres do xénero. «É unha historia de película, dunha muller forte —relata Bea—. Foise para alá e a miña familia estivo moito tempo sen ter noticias dela. Despois de 59 anos volveu á súa terra, en Xanceda». No disco faille referencia en Y fue todo a media luz, con aires de tango para conectar esteticamente coa peza orixinal. Pero Bea viu que podía ir máis alá. Entra aí en xogo a escritora Rosa Aneiros e reconstrúe a peripecia vital desta galega eclipsada pola fama do seu marido e que non volvería a Galicia ata 1983. Súa é a autoría do libro de Mareira.
Nese texto, Aneiros di: «Esta é unha historia que transita entre dous tangos. Un dos vértices reside no Río da Prata e o outro na Coruña, a un século de distancia, mar por medio. Nesa partitura invisible na que gotea a vida figuran notas de sabor a salitre e mate, a alfajor e caldo, a facturas e broa, a lixivia e té. Son liñas curvas, torneadas de palabras veladas e silencios. Porque a música é sobre todo iso: silencio».
Á aventura de Mareira sumouse tamén Yolanda Castaño. Aporta o poema Luz para tanto mar, que recita no disco. Igualmente, no tema titular intervén Pablo Milanés: «Escribinlle un correo e, como tardaba tanto en contestar, pensaba que non o faría —lembra Bea—. Cando vin o seu correo tiven que dicirlle á xente que estaba comigo que o leran, a ver se era certo que quería cantar comigo, porque caíanme as bágoas. A canción é moi de vivir e sentir. Algo moi emocional».
O disco complétase con outros temas que seguen unha liña de canción de autora con toques cubanos, jazzies, pop e fusión. «É unha viaxe desde Cabo Verde ao bolero ou ao tango, unha viaxe estilística e emocional, baseada naquelas ansias de saír do encerro», resume. Para a súa edición contou con máis de 200 mecenas, que fixeron posible unha versión física. Estréase hoxe na Coruña (Centro Ágora, 21.00 horas, entrada 10 euros) coa maior parte dos músicos que participaron na gravación. Tamén se proxectará un videoclip de Jairo Iglesias feito ex professo para este álbum.