O Museo e o colectivo Rioplatenses farán un documental sobre as súas historias
17 mar 2014 . Actualizado a las 12:03 h.O Museo e a asociación Rioplatenses en Lugo, de inmigrantes e retornados de Arxentina e Uruguai, buscan mulleres da provincia que emigraron ou retornaron a Arxentina, ou descendentes delas, e que estean dispostas a explicar a súa historia. As testemuñas recollidas quedarán rexistradas nun documental audiovisual que realizará o fotógrafo Xosé Reigosa, e que formará parte do proxecto «Mulleres de aquí e dacolá», incluído na iniciativa Culturas en Diálogo. Lugo-Arxentina, que se desenvolverá ata finais do 2014. «El documental se estrenará el 18 de diciembre en el Museo do Mar de San Cibrao por el Día del Migrante», detallan a presidenta de Rioplatenses, Ana Bereciartúa, e a coordinadora do proxecto, Pilar Sánchez. As dúas destacan a importancia que tivo a emigración feminina no país. De Palas de Rei a Viveiro, e de Monterroso a Vilalba, miles de lucenses partiron en busca dun futuro máis próspero rumbo á que foi coñecida como «a quinta provincia galega». Encontros de tango, mateadas, charlas, exposicións, concursos, obras teatrais e obradoiros serán outras das actividades que se organizarán no ciclo que coordina a xerente da Rede Museística, Encarna Lago. Colaborarán nel o Museo de la Emigración Gallega (Mega) e o Museo de la Emigración de Bos Aires. Informan no Museo e en rioplatensesdelugo@hotmail.com.